ankhen miri talvon se vo mal jaae to achchha
hai hasrat-e-pa-bos nikal jaae to achchha
jo chashm ki be-nam ho vo ho kor to behtar
jo dil ki ho be-dagh vo jal jaae to achchha
bimar-e-mohabbat ne liya tere sambhala
lekin vo sambhale se sambhal jaae to achchha
ho tujh se ayadat jo na bimar ki apne
lene ko khabar us ki ajal jaae to achchha
khinche dil-e-insan ko na vo zulf-e-siyah-fam
azhdar koi gar us ko nigal jaae to achchha
tasir-e-mohabbat ajab ik hub ka amal hai
lekin ye amal yaar pe chal jaae to achchha
dil gir ke nazar se tiri uthne ka nahin phir
ye girne se pahle hi sambhal jaae to achchha
furqat men tiri tar-e-nafas siine men mere
kanta sa khatakta hai nikal jaae to achchha
ai girya na rakh mere tan-e-khushk ko gharqab
lakdi ki tarah paani men gal jaae to achchha
haan kuchh to ho hasil samar-e-nakhl-e-mohabbat
ye siina phaphulon se jo phal jaae to achchha
vo subh ko aae to karun baton men dopahar
aur chahun ki din thoda sa Dhal jaae to achchha
Dhal jaae jo din bhi to usi tarah karun shaam
aur chahun ki gar aaj se kal jaae to achchha
jab kal ho to phir vo hi kahun kal ki tarah se
gar aaj ka din bhi yuun hi tal jaae to achchha
al-qissa nahin chahta main jaae vo yaan se
dil us ka yahin garche bahal jaae to achchha
hai qata rah-e-ishq men ai ‘zauq’ adab shart
juun shama tu ab sar hi ke bal jaae to achchha