Muneer Niyazi
ik tez tiir tha ki laga aur nikal gaya
maari jo chikh rail ne jangal dahal gaya
soya hua tha shahr kisi saanp ki tarah
main dekhta hi rah gaya aur chand dhal gaya
khvahish ki garmiyan thiin ajab un ke jism men
khuban ki sohbaton men mira khuun jal gaya
thi shaam zahr-e-rang men duubi hui khadi
phir ik zara si der men manzar badal gaya
muddat ke baad aaj use dekh kar ‘munir’
ik baar dil to dhadka magar phir sambhal gaya
Leave a Reply