har ik dard-o-gham ki dava ho ga.e
mire dil ka vo mudda.a ho ga.e
jo lab par the naale rasa ho ga.e
mire haq men paiham dua ho ga.e
idhar jazb-e-dil kamran ho gaya
udhar un ke va.ade vafa ho ga.e
tiri yaad men gum hue is qadar
har ik qaid-e-gham se riha ho ga.e
kisi gham ko bhi jo na ḳhatir men laa.e
tire gham men vo mubtala ho ga.e
mire gham ka afsana sun sun ke vo
ghanimat hai dard-ashna ho ga.e
vahi zaḳhm jo dil pe the ai ‘kanval’
gulon ki tarah ḳhush-numa ho ga.e
Leave a Reply