hai koi dard musalsal ravan-davan mujh men
bana liya hai udasi ne ik makan mujh men
mila hai izn-e-sukhan ki masafaton ka phir
khule hue hain takhayyul ke badban mujh men
sahabi shaam sar-e-chashm phailte jugnu
kisi khayal ne bo di ye kahkashan mujh men
muhajrat ye shajar-dar-shajar havaon ki
basae jaati hai khana-badoshiyan mujh men
ajiib zid pe ba-zid hai ye musht-e-khak-badan
agar hai meri rahe phir ye meri jaan mujh men
mira vajud bana hai ye kaisi mitti se
samae jaati hain kitni hi hastiyan mujh men
Leave a Reply