Mohabbat to Mohabbat Hi Nahin Thi

Rakhshan Hashmi

mohabbat to mohabbat hi nahin thi

haqiqat men haqiqat hi nahin thi

main us ki chaa.e ki pyali thi lekin

use piine ki jur.at hi nahin thi

bichhaḌne ka bhi ik apna maza tha

magar mujh men ye himmat hi nahin thi

bura mat manna par sach yahi hai

tujhe meri zarurat hi nahin thi

kise main DhunDhti apni ḳhushi men

tumhare gham se fursat hi nahin thi

hamen dil chahiye tha us ko daulat

hamare paas daulat hi nahin thi

bichhaḌne ka ḳhayal aata bhi kaise

hamare beach qurbat hi nahin thi

ki ham anmol the kahne ki had tak

hamari qadr-o-qimat hi nahin thi

ghazal men jaan ‘raḳhshan’ kaise aati

tire jazbon men shiddat hi nahin thi