Iqbal Azeem
mujhe apne zabt pe naaz tha sar-e-bazm raat ye kya hua
miri aankh kaise chhalak ga.i mujhe ranj hai ye bura hua
miri zindagi ke charagh ka ye mizaj koi naya nahin
abhi raushni abhi tirgi na jala hua na bujha hua
mujhe jo bhi dushman-e-jan mila vahi puḳhta-kar-e-jafa mila
na kisi ki zarb ghalat paḌi na kisi ka tiir ḳhata hua
mujhe aap kyuun na samajh sake ye ḳhud apne dil hi se puchhiye
miri dastan-e-hayat ka to varaq varaq hai khula hua
jo nazar bacha ke guzar ga.e mire samne se abhi abhi
ye mire hi shahr ke log the mire ghar se ghar hai mila hua
hamen is ka koi bhi haq nahin ki sharik-e-bazm-e-ḳhulus hon
na hamare paas naqab hai na kuchh astin men chhupa hua
mujhe ik gali men paḌa hua kisi bad-nasib ka ḳhat mila
kahin ḳhun-e-dil se likha hua kahin ansuon se miTa hua
mujhe ham-safar bhi mila koi to shikasta-hal miri tarah
ka.i manzilon ka thaka hua kahin raston men luTa hua
hamen apne ghar se chale hue sar-e-rah umr guzar ga.i
koi justuju ka sila mila na safar ka haq hi ada hua
Leave a Reply