tujh ko paane ke liye ḳhak-e-tamanna ho ja.un
tere qadmon men bikhar kar tira rasta ho ja.un
aur kab tak main karun mad.h-sara.i apni
mujh ko taufiq de ya-rab ki main tera ho ja.un
tujh ko koi bhi kabhi mere siva dekh na paa.e
aankh men bhar luun tujhe aur main andha ho ja.un
chand lamhon ke liye ḳhud ko mukammal dekhun
be-irada hi sahi main kabhi yakja ho ja.un
fikr-e-uqba na karun tujh men giraftar rahun
sha.eri tere liye main sag-e-duniya ho ja.un
ye karishma bhi kisi roz to raushan ho jaa.e
tu miri aarzu men teri tamanna ho ja.un
main ki amboh-e-azizan men kisi ka bhi nahin
zindagi mujh se lipaT ja ki main tera ho ja.un
ye ajab shart hai taslim-o-raza ki ‘aḳhtar’
ḳhud ko pahchanna chahun to main andha ho ja.un
Leave a Reply