Anjum Khaleeq
ye kaisi baat mira mehrban bhuul gaya
kumak men tiir to bheje kaman bhuul gaya
junun ne mujh se ta.aruf ke marhale men kaha
main vo hunar huun jise ye jahan bhuul gaya
kuchh is tapak se rahen lipaT paḌin mujh se
ki main to samt-e-safar ka nishan bhuul gaya
ḳhumar-e-qurbat-e-manzil tha na-rasi ka javaz
gali men aa ke main us ka makan bhuul gaya
har ik badalti hui rut men yaad aata hai
vo shaḳhs jo mira nam-o-nishan bhuul gaya
kuchh aisi baat kabutar ki aankh men dekhi
uqaab ḳhauf ke maare uḌaan bhuul gaya
main sar-ba-kaf sar-e-maqtal kuchh is ada se gaya
ki mera dushman-e-jan an-ban bhuul gaya
qaba.il aaj bhi shir-o-shakar nazar aate
ḳhatib-e-shahr magar vo zaban bhuul gaya
zamin ki god men itna sukun tha ‘anjum’
ki jo gaya vo safar ki thakan bhuul gaya
Leave a Reply