Kaho Kya Mehrban Na-Mehrban Taqdir Hoti Hai

Anjum Khaleeq

kaho kya mehrban na-mehrban taqdir hoti hai

kaha maan ki duaon men baḌi tasir hoti hai

kaho kya baat karti hai kabhi sahra ki ḳhamoshi

kaha us ḳhamushi men bhi to ik taqrir hoti hai

kaha main ne ki ranj-e-be-makani kab satata hai

kaha jab maqbare ya qasr ki ta.amir hoti hai

kaha main ne hisar-e-zat men ye nafs ki duniya

javab aaya ki sab kuchh haar kar tasḳhir hoti hai

kaha ye ḳhvahish-o-targhib aur ye ḳhuun ke rishte

kaha zindaniyon ke paanv men zanjir hoti hai

kaha vo jo savali aankh ki putli pe likkhi thi

kaha sab se mo.assir to vahi tahrir hoti hai

kaha ahl-e-ḳhirad ‘anjum’ tumhen be-kar kahte hain

kaha sikke ki apne des men tauqir hoti hai