gil hai aariz to qadd-e-yar darakht
kab ho aisa bahar-dar darakht
rashk se ik nihal qad ke tire
kat gae jal gae hazar darakht
khvahish-e-sang thi jo majnun ko
qabr par bhi hai meva-dar darakht
kis ki vahshat ne khaak udaai hai
dasht men hain jo pur-ghubar darakht
daman-e-yar us se uljhega
ho na gulshan men khar-dar darakht
nala-e-kohkan se jal utthe
the jo bala-e-kohsar darakht
dast-e-rangin ka us ke kushta huun
ho hina ka sar-e-mazar darakht
jis jagah dafn tha ye sokhta-jan
na uga vaan se zinhar darakht
zinat-e-khana-bagh kaun hai aaj
sajda karte hain bar-dar darakht
barg malte hain jo kaf-e-afsos
kis ke gham men hain sogvar darakht
gulshan-e-ishq ka tamasha dekh
sar-e-mansur phal hai daar darakht
dekhen gar tere qad ki balai
sar uthaen na zinhar darakht
be-samar ik raha ye nakhl-e-murad
yuun to phule-phale hazar darakht
teri duuri men ai gul-e-khubi
suukh kar ho gae hain zaar darakht
saf-ba-saf hain khade jo gulshan men
kab se bandhe hue qatar darakht
dekhte hain su-e-dar-e-gulzar
kis ke hain mahv-e-intizar darakht
mausam-e-gul hai josh-e-masti hai
laae gulshan men barg-o-bar darakht
ji men aata hai mai-kashi kiije
taak kar koi saya-dar darakht
alam-e-sheb men huun yuun ‘ghafil’
baagh men jaise be-bahar darakht
Leave a Reply