aaj hai isar ka jazba jo parvanon ke paas
thi kabhi ye daulat-e-bedar insanon ke paas
aql hai ik astin ka saanp farzanon ke paas
be-ḳhudi kitni baḌi daulat hai divanon ke paas
kis ki hai duniya ye aḳhir sahab-e-ḳhana hai kaun
mezban dekha nahin koi bhi mehmanon ke paas
azmat-e-divangi ka shor farzanon men hai
hai ghanimat ye bhi rah jaa.e jo divanon ke paas
sham.a raushan ho ga.i aa jaao jalne ke liye
ye ḳhabar jaata hai le kar kaun parvanon ke paas
gaahe abadi ke siine tak chale aate hain dasht
gaahe abadi pahunch jaati hai viranon ke paas
ashk-e-hasrat soz-e-gham dard-e-mohabbat dagh-e-dil
kya nahin sab kuchh hai tere ḳhasta samanon ke paas
tum na gar aate to khinch jaate sanam-ḳhane vahin
tum ne ḳhud tauhin ki aa kar sanam-ḳhanon ke paas
naḳhuda kashti ke ruḳh ko moḌ langar kaaT de
mujh ko sahil sa nazar aata hai tufanon ke paas
dekhen ab begane karte hain ishara kis taraf
mujh ko apnon ne to pahunchaya hai beganon ke paas
‘raaj jaane kis tarah karte hain sajde barahman
main to ban jaata huun but ja kar sanam-ḳhanon ke paas
Leave a Reply