main yuun to nahin hai ki mohabbat men nahin tha
albatta kabhi itni musibat men nahin tha
asbab to paida bhi hue the magar ab ke
us shokh se milna miri qismat men nahin tha
tai main ne kiya din ka safar jis ki havas men
dekha to vahi raat ki davat men nahin tha
ik lahar thi ghaeb thi jo tufan-e-hava se
ik lafz tha jo khat ki ibarat men nahin tha
kaifiyaten saari thiin faqat hijr tak us ke
main samne aa kar kisi halat men nahin tha
kya rang the lahrae the jo rah-ravi men
kya nuur tha jo sham-e-hidayat men nahin tha
laghzish hui kuchh mujh se bhi tughyan-e-talab men
kuchh vo bhi ‘zafar’ apni tabiat men nahin tha
Leave a Reply