Yunhi Aksar Mujhe Samjha Bujha Kar lauT Jati Hai

Imtiyaz Khan

yunhi aksar mujhe samjha bujha kar lauT jaati hai

kisi ki yaad mere paas aa kar lauT jaati hai

main bad-qismat vo gulshan huun ḳhizan jis ka muqaddar hai

bahar aati hai darvaze se aa kar lauT jaati hai

use apna banane men bhi ik anjan sa Dar hai

dua honTon talak aati hai aa kar lauT jaati hai

main apni qaid ko hi apni azadi samajh lunga

riha.i mujh ko zanjiren laga kar lauT jaati hai

agar itni hi sarkash hai to mujh pe kyuun nahin girti

vahi bijli jo mera ghar jala kar lauT jaati hai

vahan par bhi charagh-e-arzu ham ne jala.e hain

jahan se raushni bhi sar jhuka kar lauT jaati hai

use main dekh to leta huun lekin chhu nahin paata

koi shai hai jo mere paas aa kar lauT jaati hai