hue azim-e-mulk-e-adam jo ‘havas’ to khushi ye hui thi ki gham se chhute
par faragh alam se na vaan bhi mila vaan gham ye hua ki vo ham se chhute
kabhi dair men the kisi but pe fida kabhi kaabe men karte ja ke dua
tire kuche men baithe to khuub hua ki kashakash-e-dair-o-haram se chhute
yahi kahti thi laili-e-parda-nashin ki firaq ki ab use taab nahin
milun us se main ta mira qais-e-hazin gham-e-hijr ke dard-o-alam se chhute
main hua bhi jo bismil-e-tegh-e-jafa vale baaqi hai dil men abhi ye vafa
ki yaqin hai lahu mira ja-e-hina jo lage to na pa-e-sanam se chhute
na ho basta-e-chin-e-kamand-o-rasan rahe bhagta hai vo ba-dasht-e-khutan
tiri chashm ho us pe jo saya-fagan kabhi pa-e-ghazal na ram se chhute
na kyuun shaki hon bakht-e-siyah se ham ki vo madin-e-shafqat-o-lutf-o-karam
kare nala-e-shauq jo ham ko raqam to syahi na nok-e-qalam se chhute
mujhe rah men mile the vo bandhe kamar chale jaate the baagh ko vaqt-e-sahar
unhen laata pakad mujhe kis ka tha dar pa fareb ke qaul-o-qasam se chhute
hue khauf se gosha-guzin asas gaya siina pilang-e-falak ka jhulas
shab-e-hijr men yaaro baghair-e-‘havas’ mire naale jo sher ajam se chhute