Mumtaz Mirza
zamana guzra hai tufan-e-gham uthae hue
ghazal ke parde men rudad-e-dil sunae hue
hamin the jin se gunah-e-vafa hua sarzad
khade hain daar ke saae men sar jhukae hue
hamare dil ke sabhi raaz faash karte hain
jhuki jhuki si nazar hont kapkapae hue
hamare dil ke andheron ka gham na kar hamdam
hamare dam se ye raste hain jagmagae hue
shumar-e-roz-o-shab-o-mah kis ne rakkha hai
hazaron saal hue un ko dil men aae hue
guzarte rahte hain nazron se saari shab ‘mumtaz’
hazaron qafile yadon ke sar jhukae hue
Leave a Reply