Chhote Chhote Kai Be-Faiz Mafadat Ke Sath

chhote chhote kai be-faiz mafadat ke saath

log zinda hain ajab surat-e-halat ke saath

faisla ye to bahar-hal tujhe karna hai

zehn ke saath sulagna hai ki jazbat ke saath

guftugu der se jaari hai natije ke baghair

ik nai baat nikal aati hai har baat ke saath

ab ke ye soch ke tum zakhm-e-judai dena

dil bhi bujh jaega Dhalti hui is raat ke saath

tum vahi ho ki jo pahle the miri nazron men

kya izafa hua in atlas o banat ke saath

itna paspa na ho divar se lag jaega

itne samjhaute na kar surat-e-halat ke saath

bhejta rahta hai gum-nam khaton men kuchh phuul

is qadar kis ko mohabbat hai miri zaat ke saath

Leave a Comment