aaj phir sar-e-maqtal de ke ḳhud lahu ham ne
tegh-e-dast-e-qatil ki rakh li aabru ham ne
jan-e-ghuncha-o-lala ruh-e-rang-o-bu ham ne
aap ko banaya hai kitna ḳhub-ru ham ne
jab bhi lutf-e-saqi men farq aate dekha hai
baḌh ke toḌ Daale hain saghar-o-subu ham ne
barha zabanon par lag ga.i hai pabandi
barha nigahon se ki hai guftugu ham ne
rah-e-shauq men aksar vo bhi vaqt aaya hai
jab kiya hai hathon se ḳhun-e-arzu ham ne
shahr ho bayaban ho daar ho ki zindan ho
naghme zindagi hi ke gaa.e char-su ham ne
Leave a Reply