Hafeez Jaunpuri
ham ko dikha dikha ke ghairon ke itr malna
aata hai ḳhuub tum ko chhati pe muung dalna
mahshar bapa kiya hai raftar ne tumhari
is chaal ke tasadduq ye bhi hai koi chalna
ghairon ke ghar to shab ko jaate ho barha tum
bhule se mere ghar bhi ik roz aa nikalna
haT ki kuchh intiha hai zid ki bhi koi had hai
ye baat baat par to achchha nahin machalna
jalta hai ghair ham se to kya ḳhata hamari
tum ye samajh lo us ki taqdir men hai jalna
jab tak hain tere dar par dil-bastagi si hai kuchh
ye astan jo chhuTa mushkil hai ji bahalna
dekho ‘hafiz’ apne ji ki jo ḳhair chaho
baste jidhar hasin hon vo rasta na chalna
Leave a Reply