Dil Se Samjhunga Ise Dushman-E-Jaan Hone Do

dil se samjhunga ise dushman-e-jan hone do

zahr gholunga dava men khafaqan hone do

aankh bhaun us ke isharon pe ravan hone do

mil ke abru-o-mizha tir-o-kaman hone do

mere dil ko hadaf-e-tir-e-nigah karte hain

aur mujh se bhi ishara hai ki haan hone do

aag bhadki hui hai mujh ko na samjhae koi

jaan ka maal ka hota hai ziyan hone do

har tarah ham dil-e-na-fahm ko samjha lenge

daagh maujud hain pahlu ko khizan hone do

ism-e-azam ka asar ghair ko dikhla denge

yaar ka naam zara vird-e-zaban hone do

ankhen phuten bhi kahin is falak-e-bad-bin ki

zabt achchha nahin aahon ka dhuan hone do

parda Daalo miri ankhon pe na ai sharm-o-hijab

yaar be-parda hai mujh ko nigaran hone do

raat baaqi hai abhi kis liye ghabra ke uthe

top chhutne do miri jaan azaan hone do

lucknow men tumhen dikhlaenge chauka bahte

chaar aansu miri ankhon se ravan hone do

dekhun kyuun kar nahin hota falak-e-kaj sidha

dil-e-mahzun ki buland ah-o-fughan hone do

ahl-e-duniya men moassir hai har ek shai ka rivaj

mast ho jaenge sab daur-e-mughan hone do

naujavani ka maza koi kharabat men hai

mardum-e-pir ko mushtaq-e-jinan hone do

azmaish ke nazar hi jo hamare janib

paar siine se nigahon ki sinan hone do

‘bahr’ ne ab to kamar bandhi hi bad-vazai par

ab na roko ise rusva-e-jahan hone do

Leave a Comment