Ajib Shakhs Hai Dharti Pe Aasman Sa Hai

ajiib shakhs hai dharti pe asman sa hai

khuda maqam nahin phir bhi la-makan sa hai

uge jo sub.h ka suraj to ik machine hai vo

Dhale jo shaam to phir jism ki takan sa hai

sukut-e-dasht-e-tamanna hai us ko ja-e-panah

navah-e-ariz-o-gesu men be-nishan sa hai

barahna rahta hai shamshir-e-be-aman ki tarah

har ek shakhs yahan us se bad-guman sa hai

utha na paega yak lamha-e-nashat vajud

vo apni tegh-e-nafas se lahuluhan sa hai

nigah-dar-e-falak ta-falak raha vo ‘kamal’

aur ab zamin pe tuuti hui kaman sa hai

Leave a Comment