Hai Bhi Aur Phir Nazar Nahin Aati

hai bhi aur phir nazar nahin aati

dhyan men vo kamar nahin aati

mangta huun magar nahin aati

ye ajal vaqt par nahin aati

tere kushton ka roz-e-hashr hisab

ghairat o fitna-gar nahin aati

taba apni bhi ek andhi hai

khaak udani magar nahin aati

abr kis kis tarah barasta hai

sharm ai chashm-e-tar nahin aati

tum to yuun mahv-e-zulm ho ki hamin

aah karni magar nahin aati

nazr kuchh kar ke dil ko le ki ye jins

muft ai muft-bar nahin aati

mukhtasar hal-e-dard-e-dil ye hai

maut ai charagar nahin aati

yarab abad ku-e-yar rahe

ki qayamat idhar nahin aati

niind ka kaam garche aana hai

meri ankhon men par nahin aati

be-tarah padti hai nazar un ki

khair dil ki nazar nahin aati

be-pari ne uda rakha hai mujhe

hasrat-e-bal-o-par nahin aati

sab kuchh aata hai tu nahin aata

gar vafa sim-bar nahin aati

apni is aarzu ko kya kosun

aab vahan tegh par nahin aati

jaan deni to ham ko aati hai

dil ko taskin agar nahin aati

ghair kuchh mangta hai dekhen to

hai tumhen kis qadar nahin aati

dil ki apne jigar pe luun lekin

ek ki ek par nahin aati

dushman aur ik nigah men laut na jaae

chot puuri magar nahin aati

tera kucha hai misr-e-nazara

ki palat kar nazar nahin aati

un ka aana to ek aana hai

maut bhi vaqt par nahin aati

‘anvar’ is shab ki dekh lo takhir

subh hoti nazar nahin aati

Leave a Comment