kyuun ju-e-ravan aa ke yuun ankhon men khaḌi hai
lagta hai pahaḌon pe kahin barf paḌi hai
ai dard kabhi uTh bhi sahi tangi-e-dil se
muddat se dar-e-dil pe koi yaad khaḌi hai
manzil ko chale ya kisi maqtal ko chale hain
har raah yuun lagti hai ki zanjir paḌi hai
yunhi to nahin baiTh ga.e jhaaḌ ke daman
mahrumi-e-taqdir se ummid baḌi hai
do din ki mohabbat ne di ye hasti-e-javed
ik pal bhi nahin kaTti abhi umr paḌi hai
yuun ham ne nikali hai tiri rah-e-mulaqat
yuun hijr tire diid ki barakat ki ghaḌi hai
har sub.h tiri chashm-e-fusun-saz ka ghamza
har shaam tire lab se hansi phuuT paḌi hai
din hai to hai mahka tire ruḳhsar ka ghaza
shab hai to tiri maang sitaron se jaḌi hai
Leave a Reply