Poet
zindagi ki chahat men zindagi se mat khelo
raushni ke divano raushni se mat khelo
ai butan-e-be-parva kuchh ḳhuda nahin ho tum
pyaar ki ḳhuda.i men bandagi se mat khelo
aap hi ne kar Daala zindagi se begana
aap hi to kahte the zindagi se mat khelo
pyaar dil ka sauda hai aql dil ki bimari
dosti ke parde men dosti se mat khelo
raushni ki ḳhvahish men jal uThe na pairahan
raushni men sho.ale hain raushni se mat khelo
tum se kuchh nahin matlab haan magar ḳhirad-mando
ham junun-paraston ki agahi se mat khelo
naghma-e-tamanna se ḳhun-e-dil Tapakta hai
ishraton ke matavalo sha.iri se mat khelo
mehr-o-mah rahte hain tirgi ke siine men
bhuul kar ‘ra.is’-aḳhtar tirgi se mat khelo
Leave a Reply