qatra vahi ki ru-kash-e-dariya kahen jise
yaani vo main hi kyuun na huun tujh sa kahen jise
vo ik nigah ai dil-e-mushtaq is taraf
ashob-gah-e-hashr-e-tamana kahen jise
bimar-e-gham ki charagari kuchh zarur hai
vo dard dil men de ki masiha kahen jise
ai husn-e-jalva-e-rukh-e-janan kabhi kabhi
taskin-e-chashm-e-shauq-e-nazara kahen jise
is zoaf men tahammul-e-harf-o-sada kahan
haan baat vo kahun ki na kahna kahen jise
ye bakhshish apne banda-e-nachiz ke liye
thodi si punji aisi ki duniya kahen jise
ham-bazm ho raqib to kyun-kar na chhediye
ahang-e-saz-e-dard ki naala kahen jise
paimana-e-nigah se akhir chhalak gaya
sar josh-e-zauq-e-vasl-e-tamanna kahen jise
‘asi’ jo gul se gaal kisi ke hue to kya
maashuq vo ki sab se nirala kahen jise
Leave a Reply