vahi sar hai vahi sauda vahi vahshat hai miyan
ab bhi aa jaao ki dil ki vahi ḳhalvat hai miyan
vus.at-e-did simaTne hi nahin paati hai
chashm-e-ahu se hamen aaj bhi nisbat hai miyan
umr jab hijr-e-musalsal ki masafat men kaTi
ye bhi kaT ja.egi ik din shab-e-furqat hai miyan
ku-e-dildar men baaqi nahin shorida-saran
shahr daryuza-gar-e-kucha-e-shohrat hai miyan
kyuun na ham mauja-e-hairat se lipaT kar soven
vasl ab tere liye bhi to mashaqqat hai miyan
tum ne kya dekhe nahin shams-o-qamar nezon par
jashn-e-zulmat pe ab kaun si hairat hai miyan
farq-e-taban hai tira matl.a-e-ḳhurshid magar
tere kakul men chhupi sham-e-qayamat hai miyan
dasht-e-hasti men bahut abla-pa.i hai ‘nadim’
sarhad-e-marg-e-musalsal to aziyyat hai miyan
Leave a Reply