paas baiThe raho kuchh der bahal jaane do
dil-e-divana machalta hai machal jaane do
Daal do tum miri ankhon men sharabi ankhen
meri hasrat mire arman nikal jaane do
tum to apne ruḳh-e-raushan se haTa do anchal
chandni raat jo Dhalti hai to Dhal jaane do
raaz khul ja.ega gulshan ke nigahbanon ka
ai baharo hamen gulshan se nikal jaane do
gham ye hai un ki nigahen na badal jaa.en kahin
gar badalta hai zamana to badal jaane do
dusre daur ke aghaz se pahle yaaro
laḌkhaḌate hue rindon ko sambhal jaane do
husn vaalo dil-e-‘anvar’ se kinara na karo
husn ki sham.a pe parvane ko jal jaane do
Leave a Reply