Insha Allah Khan Insha
zamin se uTThi hai ya charḳh par se utri hai
ye aag ishq ki yarab kidhar se utri hai
utarti najd men kab thi savari-e-laila
Tuk aah qais ke jazb-e-asar se utri hai
nahin nasim-e-bahari ye hai pari koi
uḌan-khaTole ko Thahra jo far se utri hai
na jaan is ko shab-e-mah ye chandni-ḳhanam
kamand-e-nur pe auj-e-qamar se utri hai
chalo na dekhen to kahte hain dasht-e-vahshat men
junun ki fauj baḌe karr-o-farr se utri hai
nahin ye ishq tajalli hai haq-ta.ala ki
jo raah zina-e-bam-e-nazar se utri hai
libas-e-ah men likhne ke vaste ‘insha’
qalam davat tujhe arsh par se utri hai
Leave a Reply