Rehman Musawwir
halki halki dhuup khili thi
vo mere baazu baiThi thi
main khoya khoya rahta tha
vo uljhi uljhi rahti thi
ghar men phuul bikhar jaate the
vo jab bhi khul kar hansti thi
ab ke TuuTa tha sannaTa
ab ke ḳhamoshi boli thi
sunne vaala koi to hota
ham ne kaam ki baat kahi thi
jab main ishq men ḳhaak hua tha
tab sahra men ḳhaak uḌi thi
ik jharne ne naghma gaaya
patthar ne avaz suni thi
jashn tha barpa jangal jangal
shahron shahron aag lagi thi
ishq samundar tha be-parva
ret men naddi sar dhunti thi
aisi baat kahi thi us ne
sidhe dil par choT lagi thi
pakki inTon ka angan tha
divaron par bel ugi thi
Leave a Reply