gir jaa.e jo divar to matam nahin karte
karte hain bahut log magar ham nahin karte
hai apni tabi.at men jo ḳhami to yahi hai
ham ishq to karte hain magar kam nahin karte
nafrat se to behtar hai ki raste hi juda hon
bekar guzargahon ko baham nahin karte
har saans men dozaḳh ki tapish si hai magar ham
suraj ki tarah aag ko maddham nahin karte
kya ilm ki rote hon to mar jaate hon ‘faisal’
vo log jo ankhon ko kabhi nam nahin karte
Leave a Reply