koi mehrban nahin saath men koi haat bhi nahin haat men
hain udasiyan miri muntazir sabhi raston men jihat men
hai ḳhabar mujhe ki ye tum nahin kasi ajnabi ko bhi kya paḌi
sabhi ashna bhi hain ru-ba-ru to ye kaun hai miri ghaat men
ye udasiyon ka jo rang hai koi ho na ho mire sang hai
mire sher men miri baat men miri adaton men sifat men
karen e’tibar kisi pe kya ki ye shahr shahr-e-nifaq hai
jahan muskurate hain lab kahin vahin tanz hai kisi baat men
chalo ye bhi maana ai ham-nava ki taghayyurat ke ma-siva
nahin mustaqil koi shai yahan to ye hijr kyuun hai sabat men
miri dastaras men bhi kuchh nahin, nahin tere bas men bhi kuchh nahin
main asir-e-kakul-e-ishq huun mujhe kya milega najat men
Leave a Reply