Shikayat Hum Nahin Karte Riayat Wo Nahin Karte

Farah Iqbal

shikayat ham nahin karte riayat vo nahin karte

magar is par sitam koi vazahat vo nahin karte

ravan ho kis tarah se chahaton ka karvan apna

hamen rusvai ka dar hai baghavat vo nahin karte

hami jalva dikhate hain hami shokhi nigahon se

nahin hota asar phir bhi shararat vo nahin karte

nazar do-char ho jaae to jhuk jaati hain ye palken

magar phir bhi koi jazba inayat vo nahin karte

saba le kar payam aae ya phulon ka salam aae

kisi bhi mausam-e-dil se mohabbat vo nahin karte

koi naama koi email mere naam likh den vo

mohabbat men kabhi itni bhi zahmat vo nahin karte