shab ḳhumar-e-husn-e-saqi hairat-e-mai-ḳhana tha
aap hi mai aap hi ḳhum aap hi paimana tha
ka.aba-o-dair kalisa men abas DhunDa kiye
dil ka har gosha maqam-e-jalva-e-janana tha
rang laaya hai bara-e-dida-e-anjam jo
sham.a har har zarra-e-ḳhak-e-par-e-parvana tha
ḳhami-e-zauq-e-nazar thi varna ai nakam-e-ishq
zarre zarre se numayan jalva-e-janana tha
phir vahi saut-e-tarab-afza bane firdaus-e-gosh
jis se ik aalam shahid-e-naghma-e-mastana tha
diid ke qabil tamasha tha ye hangam-e-sahar
sham.a ka har saans mahv-e-matam-e-parvana tha
fitna-e-mazhab bhi ḳhud-bini ka ik andaz hai
varna kis ko imtiyaz-e-masjid-o-but-ḳhana tha
Leave a Reply