hai aam azal hi se faizan mohabbat ka
imkan musallam hai imkan mohabbat ka
toda nahin ja sakta paiman mohabbat ka
nuqsan khud apna hai nuqsan mohabbat ka
phir un ki nigahon se takrai miri nazren
phir badhne laga dil men tufan mohabbat ka
ek ek tamanna men lakhon hain tamannaen
armanon ki duniya hai arman mohabbat ka
is vaste muslim ki fitrat men mohabbat hai
deta hai sabaq us ko quran mohabbat ka
barbad-e-mohabbat ki halat hai ajab halat
hai be-sar-o-samani saman mohabbat ka
jazbat mohabbat ke main laakh chhupata huun
karti hain miri nazren elaan mohabbat ka
goya mire siine men mizan-e-mohabbat hai
yuun dil men jigar men hai paikan mohabbat ka
vo nuur ka partav hai ya husn ka partav hai
hai diin mohabbat ka iman mohabbat ka
jo dard ka hamil hai vo zauq men kamil hai
behis ko nahin hota iqan mohabbat ka
ijmal ye be-shak hai tafsil ka aina
mazmun pe haavi hai unvan mohabbat ka
hain us ke tasavvur ko ghere hue arman sab
rahta hai faqiron men sultan mohabbat ka
aati hai nazar us men ikhlas ki har surat
aina hai aina insan mohabbat ka
nairang mohabbat ka har sher se zahir hai
hai ‘qadr’ ka divan bhi divan mohabbat ka