jigar-moradabadi

Dil Gaya Raunaq-E-Hayat Gai

dil gaya raunaq-e-hayat gai

gham gaya saari kaenat gai

dil dhadakte hi phir gai vo nazar

lab tak aai na thi ki baat gai

din ka kya zikr tira-bakhton men

ek raat aai ek raat gai

teri baton se aaj to vaaiz

vo jo thi khvahish-e-najat gai

un ke bahlae bhi na bahla dil

raegan sai-e-iltifat gai

marg-e-ashiq to kuchh nahin lekin

ik masiha-nafas ki baat gai

ab junun aap hai gareban-gir

ab vo rasm-e-takallufat gai

ham ne bhi vaz-e-gham badal Daali

jab se vo tarz-e-iltifat gai

tark-e-ulfat bahut baja naseh

lekin us tak agar ye baat gai

haan maze luut le javani ke

phir na aaegi ye jo raat gai

haan ye sarshariyan javani ki

aankh jhapki hi thi ki raat gai

jalva-e-zat ai maaz-allah

tab-e-aina-e-sifat gai

nahin milta mizaj-e-dil ham se

ghaliban duur tak ye baat gai

qaid-e-hasti se kab najat ‘jigar’

maut aai agar hayat gai

More Poems

Leave a Comment