Naseem Nikhat
main dhuup men huun tu saaya kar de aman men ThanDi hava.en mange
safar pe niklun to maan ka anchal salamti ki dua.en mange
miri adalat hai main hi munsif vakil bhi main dalil bhi main
ḳhata karun to zamir mera ḳhud apni ḳhatir saza.en mange
suna hai pardes men hai daulat kama ke la.un to hogi izzat
magar ye dil to hamesha apne vatan ki mahki faza.en mange
vo jin ko aati hai duniya-dari yahan vahi kamyab honge
magar ye dil bhi hai kitna nadan har ek se ye vafa.en mange
suna hai chehra bhi aa.ina hai kahega sach bas yahi ḳhata hai
yahan to hai jhuuT ki hukumat zamana ham se ada.en mange
hamen na sargam na raag aa.e hamari avaz kis ko bhaa.e
hamare sheron men talḳhiyan hain zamana miThi sada.en mange
hamari dharti sulag rahi hai ki pyasa savan chala gaya hai
suno zara asman se kah do zamin kaali ghaTa.en mange
miri ana mujh ko rokti hai main us ke aage jhukun to kaise
ghurur us ka to har kisi se ḳhushamaden iltija.en mange
Leave a Reply