Ab To Khushi Ka Gham Hai Na Gham Ki Khushi Mujhe

ab to ḳhushi ka gham hai na gham ki ḳhushi mujhe

be-his bana chuki hai bahut zindagi mujhe

vo vaqt bhi ḳhuda na dikhae kabhi mujhe

un ki nadamaton pe ho sharmindagi mujhe

rone pe apne un ko bhi afsurda dekh kar

yuun ban raha huun jaise ab aai hansi mujhe

yuun dijiye fareb-e-mohabbat ki umr bhar

main zindagi ko yaad karun zindagi mujhe

rakhna hai tishna-kam to saaqi bas ik nazar

sairab kar na de miri tishna-labi mujhe

paaya hai sab ne dil magar is dil ke bavajud

ik shai mili hai dil men khatakti hui mujhe

raazi hon ya ḳhafa hon vo jo kuchh bhi hon ‘shakil’

har haal men qubul hai un ki ḳhushi mujhe

Leave a Comment