Tahir Faraz
ajiib ham hain sabab ke baghair chahte hain
tumhen tumhari talab ke baghair chahte hain
faqir vo hain jo allah tere bandon ko
har imtiyaz-e-nasab ke baghair chahte hain
maza to ye hai unhen bhi navazta hai rab
jo is jahan ko rab ke baghair chahte hain
nahin hai khel koi un se guftugu karna
suḳhan vo jumbish-e-lab ke baghair chahte hain
ThaThurti raat men chadar bhi jin ke paas nahin
vo din nikalna shab ke baghair chahte hain
jami hai gard siyasat ki jin ke zehnon par
musha.era bhi adab ke baghair chahte hain
hai e’timad unhen ḳhud par ghurur ki had tak
akele jiina jo sab ke baghair chahte hain
Leave a Reply