kaisa taara TuuTa mujh men
jhank rahi hai duniya mujh men
koi purana shahr hai jis ka
khulta hai darvaza mujh men
diya jala ke chhoḌ gaya hai
koi apna saaya mujh men
band hui jaati hain ankhen
kaisa manzar jaaga mujh men
avazen deta hai mujh ko
koi ‘mir’ ke jaisa mujh men
koi mujh ko DhunDhne vaala
bhuul gaya hai rasta mujh men
ḳhali thi gul-dan men Tahni
khila hua tha sho.ala mujh men
baras rahi thi barish bahar
aur vo bhiig raha tha mujh men
uḌta rahta hai raton ko
‘qaisar’ koi parinda mujh men
Leave a Reply