Sardar Panchhi
aas jis ki javan hoti hai
us ki unchi uḌaan hoti hai
jo qalam abid-e-adab Thahra
us ki hi an-ban hoti hai
tiir lagta hai dil ke Thiik uupar
jab nazar men kaman hoti hai
rang taqdir ka badal jaa.e
jab vafa mehrban hoti hai
yaad aati hai jis ghaḌi us ki
vo ghaḌi imtihan hoti hai
bin kahe bin sune ye dil samjhe
baat jo darmiyan hoti hai
bad-nasibi sukun se so.e
jab savere azaan hoti hai
hai buland us ka parcham-e-qismat
jis pe tu mehrban hoti hai
vo hi chhute hain asman ‘panchhi’
jin paron men bhi jaan hoti hai
Leave a Reply