Gulzar-E-Jahan Mein Gul Ki Tarah Go Shad Hain Hum Shadab Hain Hum

gulzar-e-jahan men gul ki tarah go shaad hain ham shadab hain ham

kahti hai ye hans kar subh-e-khizan sab naz-e-abas ik khvab hain ham

kis mah-e-laqa ke ishq men yuun bechain hain ham betab hain ham

kirnon ki tarah avara hain ham taron ki tarah be-khvab hain ham

mit jaane pe bhi masrur hain ham murjhane pe bhi shadab hain ham

shahba-e-shabab-o-ishq ka ik bhula hua rangin khvab hain ham

fitrat ke jamal-e-rangin se ham ne bhi uthae hain parde

barbat hai agar firdaus-e-jahan to is ke liye mizrab hain ham

khush-vaqti hai vajh-e-ranj-o-alam gulzar-e-jahan men ai hamdam

taair na pukaren shaad hain ham ghunche na kahen shadab hain ham

milne pe gar aaen koi makan khali nahin apne jalvon se

aur gosha-nashin ho jaaen agar kamyab nahin nayab hain ham

do din ke liye ham aae hain ik shab ki javani laae hain

firdaus-e-sara-e-hasti men ham rang-e-gul-e-mahtab hain ham

rusvai-e-sher-o-ishq ne vo rutba hamen ‘akhtar’ bakhsha hai

fakhr-e-dakan-o-bangal hain ham naz-e-avadh-o-panjab hain ham

Leave a Comment