Sar Pe Harf Aata Hai Dastar Pe Harf Aata Hai

Fartash Syed

sar pe harf aata hai dastar pe harf aata hai

tang hon log to sardar pe harf aata hai

vaise to main bhi bhula sakta huun tujh ko lekin

ishq huun so mire kirdar pe harf aata hai

ghar ki jab baat nikal jaati hai ghar se bahar

dar pe harf aata hai divar pe harf aata hai

kitna be-bas huun ki ḳhamosh mujhe rahna hai

bolta huun to mire yaar pe harf aata hai

chup jo rahta huun to huun barsar-e-mahfil mujrim

arz karta huun to sarkar pe harf aata hai

shikva-e-jaur-o-jafa lab pe agar aa jaa.e

dil pe harf aata hai dildar pe harf aata hai