Nashtar Khaanqahi
khiḌkiyan mat khol jins-e-jan uTha le ja.ega
ghar ke ghar ko shahr ka rela baha le ja.ega
sab namak ehsas ka saari halavat zaḳhm ki
aane vaale din ka Dar saara maza le ja.ega
is barasti raat ka ye aḳhiri aansu bhi kal
mujh se chahat us ki ankhon se vafa le ja.ega
kisht-e-dil ko chaaT lega kirm-e-duniya aur phir
bach rahega kuchh to vo sail-e-hava le ja.ega
jal-bujhega ik na ik din sab ka sab shahr-e-vafa
rah ga.i ik raakh so paani baha le ja.ega
tez-tar tufan ki aahaT aur yahan miTTi na aag
ab ise aane bhi do ye mujh se kya le ja.ega
vo mira saffak dushman laakh main ghafil na huun
ḳhud mire ghar se mujhe ik din bula le ja.ega
Leave a Reply