Ummidon Ke Panchhi Ke Par Niklenge

ummīdoñ ke panchhī ke par nikleñge

mere bachche mujh se behtar nikleñge

laxman-rekhā bhī āḳhir kyā kar legī

saare rāvan ghar ke andar nikleñge

dil to station ke raste chalā gayā

paañv hamāre thoḌā so kar nikleñge

achchhī achchhī bāteñ to sab karte haiñ

in meñ se hī bad se bad-tar nikleñge

bāzāroñ ke dastūroñ se vāqif haiñ

saare aañsū andar Dhak kar nikleñge

dil vaale to aahaT par chal dete haiñ

aql ke bande soch-samajh kar nikleñge

Leave a Comment