Asghar Gondvi
mai-e-be-rang ka sau rang se rusva hona
kabhi mai-kash kabhi saaqi kabhi miina hona
az azal ta-ba abad mahv-e-tamasha hona
main vo huun jisko na marna hai na paida hona
saare aalam men hai betabi o shorish barpa
haa.e us shoḳh ka ham-shakl-e-tamanna hona
fasl-e-gul kya hai ye meraj hai aab o gil ki
meri rag rag ko mubarak rag-e-sauda hona
keh ke kuchh laala o gul rakh liya parda main ne
mujhse dekha na gaya husn ka rusva hona
jalva-e-husn ko hai chashm-e-tahayyur ki talab
kis ki qismat men hai mahrum-e-tamasha hona
dahr hi se vo numayan bhi hai pinhan bhi hai
jaise sahba ke liye parda-e-mina hona
teri shoḳhi teri nairang adaa.i ke nisar
ik na.i jaan hai tajdid-e-tamanna hona
husn ke saath hai begana-nigahi ka maza
qahr hai qahr magar arz-e-tamanna hona
is se baḌh kar koi be-rah-ravi kya hogi
gam-e-pur-shauq ka manzil se shanasa hona
ma.il-e-sher-o-ghazal phir hai tabi.at ‘asghar’
abhi kuchh aur muqaddar men hai rusva hona
Leave a Reply