Sari Baat Na Puchha Kar

saarī baat na pūchhā kar

kuchh ḳhud bhī to samjhā kar

maiñ bichhne kī chiiz nahīñ

pāgal mujh ko oḌhā kar

us ne manzil pā lī hai

lekin mujh ko bhaTkā kar

log tujhe pahchāneñge

har din ek tamāshā kar

darvāze kuchh chhoTe haiñ

thoḌā jhuk kar niklā kar

pakne ko hai surḳh anaar

ziina dhīre utrā kar

duniyā gūñgī bahrī hai

jo muñh aa.e bolā kar

motī bhī mil jā.eñge

gahrā.ī meñ utrā kar

Leave a Comment