Kaise Dil Ka Kaha Bataen Hum

Zohheb Farooqui Afrang

kaise dil ka kaha bata.en ham

raaz ki baat kya bata.en ham

tum ne puchha bhi to nahin ham se

jo tumhen mas.ala bata.en ham

aaj insan sochta hai ye

kaise ḳhud ko ḳhuda bata.en ham

ghalatiyan ham ne bhi bahut ki hain

kis ko kis ki ḳhata bata.en ham

ham ne bhi kaun si vafa ki hai

kyon use bevafa bata.en ham

ḳhuun ka ya mohabbaton vaala

kis ka rishta baḌa bata.en ham

bhuul kar bhi na dil lagaoge

ashiqi ki saza bata.en ham

kaun aisa hai is zamane men

jis ko ham se bura bata.en ham

janvar se bura hai mat puchho

haal insan ka kya bata.en ham