khinch ke vo aur tarahdar nazar aate hain
bal jo abru pe hain talvar nazar aate hain
phir mire haal pe hai chashm-e-inayat un ki
phir vo kuchh dar-pai-e-azar nazar aate hain
kis ne mahfil men ye chehre se uTha.i hai naqab
aa.ine naqsh-ba-divar nazar aate hain
qissa-e-dar-o-rasan ḳhatm na farma.en huzur
kuchh abhi haq ke parastar nazar aate hain
ik hamin lutf-e-masiha.i ke maare to nahin
achchhe achchhe tire bimar nazar aate hain
ḳhair ho saqi-e-nau-ḳhez ki mahfil men tiri
aaj kuchh sahab-e-dastar nazar aate hain
baat sachchi kahin kambaḳht ne kah di shayad
log ‘faruq’ se bezar nazar aate hain
Leave a Reply