Jameel Malik
laakh ehsas tera kushta-e-halat rahe
tire honTon pe shagufta si koi baat rahe
tu ne har daur men ulTi hai bisat-e-alam
aaj ye aḳhiri baazi bhi tire baat rahe
ye bhi milna hai ki bas mil ke bichhaḌ jaate hain
lutf to jab hai ki ik umr mulaqat rahe
ka.enat un ke liye ek sarab ek ḳhayal
jo nigahban-e-haram mahv-e-gham-e-zat rahe
yuun sar-e-bazm koi naghma-e-javed suna
ki tire ba.ad bhi mahfil men tiri baat rahe
kya ajab ek hi manzil ho hamari ai dost
raah kaT ja.egi donon ka agar saat rahe
apna sheva ki jalate hain andheron men charagh
un ki sazish ki zamane men yunhi raat rahe
jo lagate rahe har haal pe jaan ki baazi
kyuun ‘jamil’ un ke muqaddar men faqat baat rahe
Leave a Reply