Hui Ek KHwab Se Shadi Meri Tanhai Ki

hui ik ḳhvab se shadi miri tanha.i ki

pahli beTi hai udasi miri tanha.i ki

abhi ma.alum nahin kitne hain zaati asbab

kitni vaj.hen hain samaji miri tanha.i ki

ja ke dekha to khula raunaq-e-bazar ka raaz

ek ik chiiz bani thi miri tanha.i ki

shahr-dar-shahr jo ye anjuman.en hain abad

tarbiyat-gahen hain saari miri tanha.i ki

sirf a.ina-e-aghosh-e-mohabbat men mili

ek tanha.i javabi miri tanha.i ki

saaf hai chehra-e-qatil miri ankhon men magar

mo’atabar kab hai gavahi miri tanha.i ki

hasil-e-vasl sifar hijr ka hasil bhi sifar

jaane kaisi hai riyazi miri tanha.i ki

kisi halat men bhi tanha nahin hone deti

hai yahi ek ḳharabi miri tanha.i ki

main jo yuun phirta huun mai-ḳhanon men but-ḳhanon men

hai yahi roza namazi miri tanha.i ki

‘farhat-ehsas’ vo ham-zad hai mera jis ne

shahr men dhuum macha di miri tanha.i ki