Mumkin Jahan Nahin Thi Wahan kaT Di Gai

Nasir Amrohvi

mumkin jahan nahin thi vahan kaaT di ga.i

kuchh din ki zindagi thi miyan kaaT di ga.i

muflis jo the vo pyaas ki shiddat se mar ga.e

mahlon ki samt ju-e-ravan kaaT di ga.i

main ne buland ki thi sada ehtijaj ki

phir yuun hua ki meri zaban kaaT di ga.i

teri zamin pe saans bhi lena muhal tha

majbur ho ke ziist yahan kaaT di ga.i

meri saza-e-maut pe ik jashn tha bapa

vo shor tha ki meri fughan kaaT di ga.i

dast-e-hunar pe nok-e-sinan par ghurur hai

lekin jari jo nok-e-sinan kaaT di ga.i

pahle to baat baat pe Toka gaya mujhe

phir tang aa ke meri inaan kaaT di ga.i

‘nasir’ hai rah-e-shauq men ‘momin’ ka mo’taqid

umr-e-ravan dar ishq-e-butan kaaT di ga.i